नेपालको प्रदेश नं. ७ को दार्चुला जिल्लामा अवस्थित यस अपिहिमाल गाउँपालिका भौगोलिक हिसाबले करिब ८०ं५०’ देखि ८१ं६’ पूर्वी देशान्तर र २९ं५०’ देखि ३०ं८०’ उत्तरी अक्षांशमा रहेको छ । करिब ६१३.९५ वर्ग कि.मी. क्षेत्रफल रहेको गाउँपालिकाको पूर्वमा बझाङ जिल्ला, पश्चिमतिर नौगाड गाउँपालिका, दक्षिणमा मार्मा गाउँपालिका र उत्तरमा व्यास गाउँपालिका रहेका छन् । अपिहिमाल गाउँपालिका मिति २०७३ फागुन महिनामा घोषणा गरिएको थियो । खण्डेश्वरी, घुसा, गुल्जर(न.१) र शितोला(५–८) गाविसहरु समेटेर जम्मा ६ वटा वडा कायम गरिएको छ ।

यो गाउँपालिका जिल्ला दरमुकामदेखि २३ कोष टाढा रहेको छ भने अझै पनि यस गाउँपालिकालाई सडक यातायातले छुन सकेको छैन । करिब ६७७९ जनसंख्या रहेको यस अपिहिमाल गाउँपालिका सुदूरपश्चिमकै अग्लो हिमाल अपी हिमाल बाट राखिएको हो । यो गाउँपालिका भौगोलिक विकटतासंगै विविधता पनि रहेको छ । हावापानीको हिसावले न्यानो समशीतोष्ण, ठण्डा समशीताेष्ण, लेकाली र हिमाली रहेको छ । यस क्षेत्रमा अधिकांश भागहरु हिमाल र पहाडले ओगटेकोछ ।

प्राकृतिक र साँस्कृतिक रुपमा यो गाउँपालिका परिपूर्ण छ । अपी, नाम्पा, कापचुली र जेठी बौरानी यस गाउँपालिकाको प्रमुख हिमालहरु हुन । जडीबुटीहरुले पनि सम्पन्न रहेको यस गाउँपालिकामा यार्सागुम्बा, पाँचऔंले, लसुन, कटुकी आदि महत्वपूर्ण जडीबुटीहरु पाइन्छ र यो मूख्य आय स्रोतकोलागि उपयोग गरिन्छ । साँस्कृतिक रुपमा मल्देशी चालचलन र सौका समुदायको परम्परा यहाँको मूख्य संस्कृतिको रुपमा रहेको छ तर हिन्दू धर्म मान्नेहरु कै बाहुल्यता यस गाउँपालिकामा रहेको छ । धार्मिक धरोहरको रुपमा क्षेत्ती र घाजिरलाई शुर्मा देवीको पवित्र स्थान मानिन्छ र करिब १५ दिन लामो शुर्माको जात्रा आफ्नै मुल्य मान्यता अनुसार धार्मिक आस्था भएका भक्तजनको भक्तिका साथ मनाउने गरिन्छ । यो जात्रा दार्चूला र बझाङको सिमानामा रहेको सुर्मा सरोवर ताललाई देवीको प्रमुख स्थान मानेर पुजापाठ गर्ने परम्परा छ । जातजातिको रुपमा यो गाउँपालिकामा क्षेत्री र ब्राम्हणको बाहुल्यता रहेको छ । धामी, ठेकरे, रोकाया, कार्की, बोहरा, मन्याल, जागरी, ठगुन्ना, अटयाल, लोथ्याल वि.क., औरे, महता, बुढाथोकी आदि जातजातिहरु बसोबास गर्दछन् ।

यस क्षेत्रका बासिन्दाहरु मुख्यतया कृषि पेसामा नै आश्रित रहेका छन । मुख्य बालीनाली र गेडागुडीको रुपमा जौ, गहु, मकै, फापर, कोदो, मार्सी, आलु, सिमी आदि उत्पादन हुन्छ । साक्षरताको हिसावले करिव ७५ प्रतिशत साक्षर रहेको छ तर अझै पनि रुढिवादी सोचको प्रभाव भने कायमै रहेको छ । गाउँपालिका भरी दुईवटा मात्र माध्यमिक विद्यालयहरू छन् । क्षेत्तेली, डोटेली र अन्य मिश्रित भाषाको प्रयोग यस गाउँपालिकामा गरिन्छ । अपिहिमाल गाउँपालिका जलस्रोतले भरिपूर्ण छ ।यहाँ चौलानी, कापुखोला, धरम खोला आदि खाेलाहरू रहेको छन् । यस क्षेत्रमा खेतियोग्य जमिन भन्दा बढि अन्य जमिन रहेको छ । नगदे बालीकाे रूपमा प्याज, लसुन, खुर्सानी इत्यादि पाइन्छ र फलफूलमा स्याउ, पुलम, आरु, ओखर इत्यादि पाइन्छ । यस गाउँपालिका विकासका पूर्वाधारबाट धेरै नै पछि परेको कारण यस क्षेत्रको व्यवसायिक सफलता त्यति भेटाउन सकिदैन ।