करैयामाई गाउँपालिका नेपालको संविधान २०७२ बमोजिम भएको स्थानीय पुनःसंरचना अनुसार साविकको हरैयाको वडा नं. २, ३, ४, ५, ७, ८ र ९ त्यस्तै करैयामाई गाविसको वडा नं. १, २, ३, ४, ५, ६, ७ र ९ सिहोर्वा गाविस १, २, ३, ४, ६, ७, ८ र ९, तेतरिया, उमजन र नरही गाविसको सबै वडा मिलेर निर्माण भएको करैयामाई गाउँपालिका हो ।
यस करैयामाई गाउँपालिकाको कुल क्षेत्रफल ४७.६९ वर्ग कि.मी. रहेको छ । यसको पूर्वमा कोल्हवी न.पा., पश्चिममा कलैया उपमहानगरपालिका, उत्तरमा कोल्हवी न.पा. तथा जीतपुरसिमरा उपमहानगरपालिमा पर्दछन् भने दक्षिणमा पचरौता गाउँपालिका, बारागढी गाउँपालिका तथा महागढीमाई न.पा. पर्दछन् ।
यस गाउँपालिकाको कुल जनसंख्या २६४८७ रहेको छ । यसरी कुल जनसंख्यामा ४९.१३ प्रतिशत महिला रहेका छन् भने ५०.८७ प्रतिशत पुरुष रहेका छन् । ८ वटा वडामा विभाजन भएको यस गाउँपालिकाको वडा नं. ७ (साविकको उमजन गाविस) मा सबैभन्दा धेरै ९७२ घरपरिवार संख्या र ५६६९ जनसंख्या रहेको छ । जुन कुल जनसंख्याको २१.४० प्रतिशत रहेका छ । यसैगरी वडा नं. २ (साविकको करैयामाई गा.वि.स. को वडा नं. १, २, ३ र ४) सबैभन्दा सानो २७२ घरपरिवार संख्या तथा १७३१ जनसंख्या भएको वडा हो । जसले कुल जनसंख्याको ६.५३ प्रतिशत जनसंख्या आगटेको छ ।
वडा नं. ७ मा अवस्थित बारा गढी मन्दिरशक्ति पिठ र मनोकामना पुरा हुने विश्वासको धार्मिक स्थल हो ।
वडा नं. २ मा अवस्थित करैयामाई मन्दिरशक्तिकी देवी र रोग व्याधी हट्ने विश्वास लिइन्छ ।

यस गाउँपालिकाको कार्यालय करैयामाई गाउँपालिकाको वडा नं. २ मा अवस्थित छ भने वडाहरु साविकको गाविस भवनहरुबाट सञ्चालनमा रहेका छन् ।
करैयामाई गाउँपालिकामा जम्मा २० वटा सामुदायिकविद्यालयहरु रहेका छन् । जसमध्ये १५ वटा प्राथमिक विद्यालय, ३ वटा निम्न माध्यमिक तथा २ वटा उच्च मा.वि. रहेका छन् । त्यसैगरि जम्मा ७ वटा निजी प्राथमिक समेत रहेको देखिन्छ ।
यस गाउँपालिकामा वडा नं. ७ मा हाहाहेयमाई दह, उमजन, वडा नं. २ मा राजदेवीमाई पोखरी, करैया, वडा नं. ७ मा जनता मा.वि. पोखरी, उमजन, वडा नं. ८ मा सिरसिया पोखरी, नरही, वडा नं. ८ मा हेङ्गीलिया, नरही, वडा नं. १ मा रामजानकी पोखरी, हरैया लगायत पोखरी तथा ताल तलैया रहेका छन् ।

करैयामाई मन्दिर (राजदेवीमाई मन्दिर), हरैया मस्जीद, बारा गढीमाई मन्दिर, लौतन मस्जीद, रामजानकी मन्दिर, हनुमान मन्दिर, माई ब्रह्मबाबा मन्दिर, रामजानकी मठ लगायतका धार्मिक स्थलहरु रहेका छन् । दशै, तिहार, होली, तिज, माघी,रक्षा बन्धन, बकर ईद, ईदल फितर, ल्होसार, उभौली पर्व लगायतका पर्वहरु मनाइन्छ ।
यस गाउँपालिकामा सबैभन्दा बढि ४९.६९ प्रतिशत मानिसहरुको मातृभाषा भोजपुरी हो भने सबै भन्दा कम ०.१३ प्रतिशत मानिसहरुको मातृभाषा मगर रहेको देखिन्छ । भोजपुरी पछि २८.६० प्रतिशत मानिसहरुको मातृभाषा थारु रहेको देखिन्छ ।हरैया स्वास्थ्य चौकी, करैया स्वास्थ्य चौकी, सिहोर्वा स्वास्थ्य चौकी, तेतरिया स्वास्थ्य चौकी, उमजन स्वास्थ्य चौकी , गडहल स्वास्थ्य चौकी लगायतका स्वास्थ्य संस्थाहरु रहेका छन् ।