लालबन्दी नगरपालिका नेपालको संविधान २०७२ को धारा २९५ को उपधारा (३) बमोजिम गठित गाउँपालिका, नगरपालिका, स्वायत्त, संरक्षित वा विशेष क्षेत्रको नाम, संख्या तथा सिमाना निर्धारण आयोगको सिफारिसमा बनेको ७५३ वटा स्थानीय तह मध्येको २ नं. प्रदेश अन्तर्गतको सर्लाही जिल्लामा पर्ने एक स्थानीय तह हो । नेपालमै गोलभेडा (टमाटर)उत्पादन र निर्यातका लागि ख्यातिप्राप्त यस नगरपालिका साविकको लालबन्दी नगरपालिका (साविक गाविस लालबन्दी, पत्थरकोट र जब्दी), रनेत्रगंज, रानिगंज, परवानिपुर तथा नारायणखोला गाविस समायोजन भई निर्माण भएको हो ।

यस नगरपालिकाको कूल क्षेत्रफल २३८.५ वर्गकिलोमिटर रहेको छ । यहाँको कूल जनसंख्या ५९,३९५ (जनगणना २०६८ अनुसार) रहेको छ । यस नगरपालिकामा १७ वटा वडा रहेका छन् । यो सर्लाही जिल्लाकै सबैभन्दा बढीक्षेत्रफल भएको नगरपालिका हो । यस नगरपालिकाको केन्द्र वडा नं. ६ स्थित साविक लालबन्दी नगरपालिकाको कार्यालयमा रहेको छ ।

पूर्व पश्चिम महेन्द्र लोकमार्ग अवस्थित लालबन्दी बजार यस नगरपालिका क्षेत्रभित्रका व्यापारिक क्षेत्रमध्ये एक मुख्य क्षेत्र हो । पूर्व ईश्वरपुर नगरपालिका, पश्चिम हरिवन र हरिपुर नगरपालिका, उत्तर सिन्धुली जिल्ला र दक्षिणमा हरिपुर र ईश्वरपुरसंग सिमाना जोडिएको यस नगरपालिकाकोलालबन्दी बजारजिल्लाको एक मुख्य व्यापारिक स्थल हो । बढ्दो शहरीकरण, व्यवसायिक क्रियाकलापमा वृद्धिका कारण यो नगरपालिका जिल्लामा आकर्षणको केन्द्र बन्दै गइरहेको छ तथा जिल्लाको सबैभन्दा ठूलो नगरपालिकाका रुपमा विकास भइरहेको छ ।

’’स्वच्छ, सुन्दर र समुन्नत शहर, सर्लाहीको शान लालबन्दी नगर’’’ भन्ने मूल नारालाई आत्मासात गर्दै यस नगरपालिका क्षेत्रको समृद्ध, समुन्नति र विकासको लागि सिंगो नगरपालिका परिवार एकतावद्ध ढङ्गले अगाडि बढिरहेको छ । नगरपालिका क्षेत्रभित्रका महिला, आदिवासी जनजाति, दलित, अपाङ्गजस्ता वर्ग र क्षेत्रको आर्थिक र सामाजिक उनन्यनको लागि नगरपालिका कटिवद्ध रहेको छ ।

लालबन्दी नगरपालिकाको सबैभन्दा समृद्ध पक्ष भनेको यहाँको तरकारी उत्पादन नै हो । त्यसमा पनि टमाटर(गोलभेडा) उत्पादनले नेपाल भरि नै परिचय दिएको छ । यस नगरपालिकाको उत्तरमा चुरे क्षेत्र पर्ने हुँदा वन जंगल र जैविक विविधताले भरिपूर्ण भएको यस नगरपालिकाको डाबरी डाँडा, जलकिनी मन्दिर, डुमडुमे शिवालय मन्दिर परिसर, वेतिनी देवालय परिसर, विभिन्न बौद्ध गुम्बाहरु, चर्चहरु, मश्जिद र मिश्रित जानजातिको बसोबास भएको हुँदा सांस्कृतिक सम्पदाको हिसाबले समेत समृद्ध देखिन्छ ।

स्वास्थ्य सेवाको क्षेत्रमा १५ शैयाको सरकारी अस्पताल, निर्माणाधिन १०० शैयाको सामुदायिक सहकारी अस्पताल तथा सामूदायिक आँखा उपचार केन्द्र र विभिन्न संघ सस्ंथाद्वारा संचालित स्वास्थ्य सेवाहरु यस नगरपालिकामा उपलब्ध रहेको छ । स्नातकोत्तर तहसम्म अध्ययन गर्न सकिने सामुदायिक विद्यालय जनज्योति बहुमुखी क्याम्पस, सि.टि.इ.भि.टिको सम्बन्धन प्राप्त ३ बर्षे डिप्लोमा कम्प्युटर ओभरसियर कोर्ष र १५ महिने सवओभरसियर कोर्ष पठाइ हुनेजन जन्ज्योति प्राविधिक शिक्षालय, विभिन्न संकायमा नेपाली तथा अंग्रेजी माध्यमबाट कक्षा १२सम्म अध्ययन हुने जनज्योति उ.मा.वि.,अन्य सबै वडाहरुमा आ.वि., नि.मा.वि. र मा.वि. गरी कुल ४० सामुदायिक विद्यालय र जिल्लामै ख्याति कमाएका र ग्रामिण क्षेत्रमा स्थापना भएका प्रसस्त निजी विद्यालयहरु रहेकाले शिक्षा क्षेत्रमापनि अग्र स्थानमानै रहेको छ ।

तुलनात्मक रुपमा शहरी क्षेत्र कम भएपनि बाटो घाटोहरुको अवस्था सन्तोषजनक रहेको यस नगरपालिकामा विद्युत, टेलिफोन, मोवाईल सेवा लगाएत संचारको क्षेत्रमा विभिन्न इन्टरनेट सेवाहरुले ९० प्रतिशत सेवा उपलब्ध गराउँदै आइरहेका छन ।