नगर प्रमुख राणाको तलव मानवीय सेवामा

१ वर्ष अगाडि नारायण कुवँर

नेपालगञ्ज, ३ असोज । नेपालगञ्ज उपमहानगरपालिकाका नगर प्रमुख डा. धवलशम्शेर राणाले आफनो तलव मानवीय सेवामा लगाएका छन । जनप्रतिनिधिको रुपमा आफ्नो कार्यकाल भरी पाइने तलव/भत्ता नलिने घोषणा गरेका नगर प्रमुख डा. राणाले पहिलो महिनाको तलव र भत्ता आज एक समारोहबीच व्रम्हाकुमारी इश्वरीय विश्वविद्यालय राज योग केन्द्रलाई प्रदान गरे ।

सरकारले उपमहानगरपालिकाका नगरप्रमुखलाई मासिक ४५ हजार रुपैंयाँ पारिश्रमिक दिने गरेको छ । कर कट्टागरी ४० हजार र १० हजार बराबर भत्तागरी हुनआउने ५० हजार बराबरको चेक नगर प्रमुख राणाले केन्द्र प्रमुख व्रम्हाकुमारी दुर्गादेवीलाई प्रदान गरे । मेयरका रुपमा प्रतिष्पर्धा गरिरँहदा नै राणाले तलव, भत्ता नलिने उद्घोष गरेका थिए । पूुर्व घोषित प्रतिवद्धता अनुसार नगर प्रमुख राणाले सबै महिनाको तलव नियमित रुपमा मानवीय सेवाकालागि समपर्ण गर्ने बताए ।

राणाले थप तलव /भत्ता शिक्षा र स्वास्थ्य जस्ता आधारभूत आवश्यकता परिपूर्तिमा सहयोग गर्ने बताए । यस अघि नगरपालिकाको मेयर हुँदापनि राणाले तलव नलिई स्वास्थ्य र सरसफाईमा सहयोग गरेका थिए । सहयोग प्राप्तिपछि व्रम्हाकुमारी दुर्गादेवीले सहयोग रकम मानवीय सेवा र उत्थानमै सदुपयोग हुने विश्वास दिलाइन् ।