बुटवल उपमहानगरको पूर्वाधारका काम शुरु

११ महिना अगाडि नारायण कुवँर

बुटवल, २ असोज ०७५ । बुटवल उप–महानगरपालिकाले पूर्वाधार विकासका कामहरुलाई प्राथमिकताका साथ अगाडि बढाएको छ । खासगरी उपमहानगरले वडा नं. १४ देखि १९ मा रहेका विभिन्न सडकहरुलाई पहिलो प्राथमिकता दिंदै स्तरोन्नतिका कामहरु पूरा गरेको छ । केही ठाउँमा नमुना काम गरिरहेको बताएको छ । उप–महानगरपालिका प्रमुख शिवराज सुवेदीले गाउँ विकास समितिबाट एकै चोटी उप–महानगरपालिकामा समाहित भएका ठाउँलाई पहिलो प्राथमिकता दिइएको बताउँदै नमुना पिचसम्मका काम सम्पन्न भएको बताए । उनले पूर्वाधार विकास र उज्यालो सहरका पहिलो चरणका कामहरु पूरा भएको भन्दै अब दोस्रो चरण अगाडि बढेको बताए ।

वर्षात् सकिने वित्तिकै मुख्य शहरका सडकहरुलाई नमुना पिच बनाइने मेयर सुवेदीले जानकारी दिए । बुटवलका १९ वटै वडाहरुमा गरी पाँच हजार मिटर सडकमा पक्की तथा मर्मतका कामहरु गरिएको योजना शाखाले प्रमुख सुवेदीसमक्ष प्रतिवेदन दिएको छ । उपमहानगरका महाशाखाहरुलाई जिम्मा दिएका कामहरुको प्रगति विवरण प्रमुखसमक्ष हरेक महिनामा पेश गर्ने गरिन्छ । ठूला मझौला र साना गरी ४ सय ६० भन्दा बढी नाला, कल्भर्टमा ह्युमपाइप जडानलगायतका कामहरु सम्पन्न भइसकेका छन् । करिव ५० लाख सरकारी अनुदानमा सडक पक्की गरिनुका साथै २७ पुल तथा कल्र्भट निर्माण तथा मर्मत र करीब ९७ ह्युमपाइप विस्तार गरिएको प्रमुख सुवेदीले जानकारी दिए । उज्यालो शहर अभियानअन्तर्गत विद्युत प्राधिकरण कार्यालयको सहकार्यमा सेमलार मोतीपुर, तामनगर, नयाँगाउँलगायतमा करिब ४ हजार मिटर विद्युतीय लाइन विस्तार गरी आठवटा ट्रान्सफर्मर जडान गरिएको र बाँकी ठाउँमा पनि प्रक्रिया अन्तिम चरणमा पुगेको सुवेदीले बताए । यी क्षेत्रहरुमा विद्युत भएर पनि टुकी बालेको जस्तो अवस्था थियो । ‘यस क्षेत्रका बासिन्दाहरु बत्ती मुनीको अँध्यारो हुनु परेको भन्दै गुनासो गर्थे ।

त्यसलाई पहिले सम्बोधन गर्नुपर्छ भन्नेमा हामी चिन्तित थियौं’ उपप्रमुख गुमादेवी आचार्यले पूर्वाधार विकासलाई नै पहिलो प्रथमिकता दिइएको बताइन । उनले कामहरु अझै बाँकी रहेको र तिनलाई अब प्राथमिकता निर्धारण गरेर पूरा गर्ने तयारी भइरहेको बताइन ।
उज्यालो शहर अभियानअन्तर्गत नगरका विभिन्न स्थानमा एक सय ५६ थान सौर्य सडक बत्ती जडान गरेको छ । ती बत्तीहरुमा डिजिटल विज्ञापन राख्न मिल्ने गरी एपेक्स कम्पनीले उप–महानगरपालिकासँग सहकार्य गरेको राजस्व शाखाको विवरणमा छ । सार्वजनिक तथा निजी साझेदारीमा राजमार्गका विभिन्न नौ स्थानमा सौर्य बत्तीसहितको यात्रु प्रतिक्षालय निर्माण, छ ट्राफिक आइल्याण्ड स्थापना र राजमार्ग चौराहदेखि पुष्पलाल पार्क हुँदै तिनाउँ पुलसम्मको सडक खण्डमा करिब १ सय थान सौर्य बस्ती जडान गरिएको प्रवक्ता रेग्मीले बताए । उप–महानगरपालिका अन्र्तगतका सबै वडाहरुमा गरेर करिब २८ किलोमिटर कच्ची सडक वडा स्तरबाटै कल्भर्ट, ह्युम पाइप सहित ग्राभेल सडकमा स्तरोन्नती गर्ने काम सम्पन्न भएकोे योजना प्रमुख ईन्जिनियर सुमन श्रेष्ठले जानकारी दिनुभएको छ । करिब दुई हजार एक सय ७७ मिटर सडक पिसिसी गरिएको छ, सडक बोर्ड अन्र्तगत मिलनचोकदेखि तीनकुने हँुदै वाणिज्य क्याम्पस जाने बाटो, बेसक्याम्प चोकदेखि आम्दा हस्पिटलको बाटोलगायत अन्य ठूला र साना गरेर करिब ५ हजार मिटर सडक पिच निर्माण तथा मर्मत कार्य सम्पन्न भएको योजना प्रमुख ई श्रेष्ठले बताए ।

बुटवल उप–महानगरपालिकाका १९ वटै वडाहरुमा उपभोक्ता समिति मार्फत पूर्वाधार विकासका कामहरु भइरहेको जानकारी दिंदै प्रमुख प्रशासकीय अधिकृत राजनकुमार बिसीले जनसहभागितामा धेरै कामहरु भएको बताए । नेपाल सरकारको सर्शत अनुदानमा सञ्चालित ५० लाख भन्दा बढी लागतका सडक पिच योजना अन्र्तगत वडा ४ को ओम शान्ती मार्ग र दरबार लाइन नमूना सडकका रुपमा पिच गरिएको बताउँदै प्रमुख प्रशासकीय अधिकृत बिसीले बाँकी कामहरु वर्षा लगत्तै सुरु हुने जानकारी दिए । यस्तै, वडा नं. ११ को देवी पथ, वडा नं. १२ को त्रिदेवी पथ र ग्लोवल पिसपार्क –मिलनपार्क जाने शान्ति मार्ग पिच निर्माण, वडा नं. १३ को विशालपथ हँुदै जवई वाटर पार्क जोड्ने बाटो, वडा नम्बर १४ को विनायकपुर मोतिगंज जोड्ने सडक, वडा नं. १५ को उजेलापुर भेराइटी चोकदेखी ढवाहा जोड्ने पुलसम्मको बाटो, वडा १५ को उजेलापुर बेलभरिया हुलाकी सडक, वडा १६ को नवरत्न माविदेखी हिरापुर पुलसम्मको सडक, वडा नम्बर १६ को बैठौलीदेखि कपरकट्टी हुँदै देवी मन्दिर जोड्ने सडकहरु स्तरोन्नति भएको उपमहानगरको योजना शाखाका वरिष्ठ अधिकृत डोलराज अर्यालले जानकारी दिए । यस्तै वडा १९ को गौदी राइस मिलदेखि मनहोरा पुल हुदैं ७ कुला जाने सडक र नहरपुर माविदेखि दक्षिण ७ कुला मुहानसम्म जाने सडक निर्माण कार्यक्रम अन्र्तगतका ठूला तथा महत्वपूर्ण योजनाहरु मार्फत करिब ८ हजार मिटर सडक तथा नालीको निर्माण काम सम्पन्न भएको अर्यालको योजना शाखाको टिमले तयार पारेको प्रतिवेदनले जनाएको छ ।

स्थानीय उपभोक्ता तथा व्यवसायीहरुको सहभागितामा मुख्य बजार क्षेत्र भित्र रहेका अमरपथ–हस्पिटल लाइन, ट्राफिक चोक–नेपालगंज रोड, हिमाली पथ–बुद्ध मन्दिर, संगमपथ, विपी पथलगायत स्थानहरुमा पिच निर्माण गर्ने काम अन्तिम चरणमा पुगेको प्रवक्ता रेग्मीले बताए । यस्तै भवन तथा अन्य पूर्वाधारतर्फ वडा २ मा वडा कार्यालय निर्माण गर्ने काम अन्तिम चरणमा पुगेको उपमहानगरले बताएको छ । निर्माण अन्तिम चरणमा पुगेको उक्त वडा कार्यालय भवनको हालै नगर प्रमुख सुवेदीले निरीक्षण गर्दै सेवाग्राहीलाई सहज हुने गरी संरचना छिटो निर्माण गर्न निर्देशन दिएको छ ।
यस्तै, हाटबजारमा सपिङ्ग क्वोल र कम्प्लेक्सको तला थप गर्ने काम भइरहेको छ । करिब १६ वटा हाटबजार सेड निर्माण गरिएको छ । करिब २० वटा सामुदायिक भवन तथा मठ मन्दिर, चर्च, गुम्बा निर्माण तथा मर्मत सम्भार गरिएको उपमहानगरले बताएको छ । विद्यालय तथा सामुदायिक भवन र सार्वजानिक जग्गामा गरेर करिब ८ सय २२ मिटर वाउण्ड्रीवाल निर्माण तथा तारबार गरिएको छ । करिब १७ वटा कार्यालय भवनहरुको मर्मत सम्भार तथा पार्टेशन गरिएको छ । सिचाई तथा नदी नियन्त्रण नदीजन्य पदार्थको आईई अध्ययन सम्पन्न भएको उपमहानगरले जनाएको छ । सिचाईका लागि करिब १ सय ७० मिटर कूलो तथा नहर निर्माण गरिएको छ । योजना शाखाका अनुसार करिब ८ सय ५८ मिटर खोला नाला तटबन्ध गरिएका छन् । करिब १ हजार ५ सय थान ग्याबिन तार जाली वितरण गरी नदी तटको व्यवस्थापन गरिएको र करिब ३३८ मिटर खोल्सी सुधार गरिएको जानकारी दिए ।