मोनोरेल सपना : निमार्ण सुरु हुन अझै एक बर्ष लाग्ने

९ महिना अगाडि ७६१ खवर डटकम

काठमाडौँ, २९ भदौ । उपत्यकाको चक्रपथमा मोनोरेल सञ्चालनका लागि चाइनाको चाइना रेल्वे २५औँ ब्यूरो गु्रप कम्पनी लिमिटेड (सिआरसिसी) कम्पनीले प्रारम्भिक सम्भाव्यता अध्ययन प्रतिवेदन काठमाडौँ र ललितपुर महानगरपालिकालाई बुझाएको छ ।

चक्रपथमा सञ्चालन गरिने यो मोनोरेलका लागि गत जेठ ११ गते ६ महिनाभित्र सम्भाव्यता अध्ययन गरि प्रारम्भिक प्रतिवेदन तयार पार्ने जिम्मा चाइनाको सिआरसीसी कम्पनीले लिएको थियो ।

कम्पनीले अध्ययनपछि प्रतिवेदन पेश गरेपनि निमार्णको काम थाल्न भने अझै एक बर्ष समय लाग्ने देखिएको छ । काठमाडौं महानगरपालिकाका अनुसार कम्पनीले थप अध्ययन तथा डीपीआर अध्ययन गरि प्रतिवेदन पेश गरेपछि मात्र काम थालनी हुन्छ । यसका लागि आगामी आर्थिक बर्षसम्म लाग्न सक्ने जनाइएको छ ।

महानगरपालिकाका प्रवक्ता ज्ञानेन्द्र कार्कीले भर्खर सम्भाव्यता अध्ययन मात्र भएकाले डीपीआरपछि काम सुरु हुन समय लाग्ने बताए । ‘अहिले यो कम्पनीले मोनोरेल सञ्चालनका लागि सम्भाव्यता अध्ययन गरि प्रतिवेदन वुझाएको छ’, कार्कीले ७६१ खबरसँग कुरा गर्दै भने, ‘अझै डीपीआर गर्नैछ, त्यसपछि काम थालनी हुन आगामी आर्थिक बर्षसम्म लाग्छ ।’

कार्कीका अनुसार अहिले प्रारम्भिक काम मात्र भएकाले यसको कूल लागत, निमार्ण अवधी लगायतका बिषय अझै टुंगोमा पुग्न समय लाग्ने छ । महानगर, संघीय सरकार तथा अन्य नगरपालिकासँगको सहकार्यममा, (पीपीपी) मोडलमा कसरी काम अघि बढाउने भन्ने अझै छलफलमै रहेको कार्कीले बताए । यद्यपी, अव चत्रपथमा मोनोरेल सञ्चालन गर्ने सपना भने साकार वनाउने पक्षमा महानगर लागेको उनको भनाइ छ ।


चक्रपथमा मोनोरेल निर्माणका लागि करीब एक खर्ब १६ अर्ब रुपैयाँजति लागत लाग्ने प्रारम्भिक अध्ययनसहितको प्रतिवेदन सिआरसिसीले बुझाएपनि यो पूर्ण लागत विवरण भने नभएको महानगरले जनाएको छ । यसको यकीन लागतखर्च यो भन्दा बढी हुन सक्ने जनाइएको छ । कम्पनीको प्रारम्भिक प्रतिवेदनमा भने प्राविधिक, भौगोलिक, आर्थिक, वातावरणीय सबैको सम्भाव्यताको समेत अध्ययन गगरिएको उल्लेख छ । यो कम्पनीले पनि चक्रपथमा मोनोरेल निर्माणका लागि इच्छा देखाएको छ ।

कम्पनीका अनुसार सिआरसिसीले पहिलो चरणमा काठमाडौंको कोटेश्वदेखि कलङ्कीसम्म, दोस्रो चरणमा कलङ्कीदेखि चक्रपथसम्म र तेस्रो चरणमा चक्रपथदेखि कोटेश्वरसम्म मोनोरेल निमार्ण गर्न सकिने जनाएको छ ।
प्रतिवेदन अनुसार काम थालनी भएको ३ बर्ष अवधीमा निमार्ण पुरा हुन सक्छ । चक्रपथको कूल दुरी २७ दशमलव पाँच किलोमिटर रहेको र यसमा २१ स्थानबाट यात्रु चढाउने र ओराल्ने स्टेशन बनाउन सकिने पनि जनाइएको छ ।