बेगनास तालमा शनिबार दिउँसो डुंगा पल्टिँदा पाँच जना बेपत्ता भएका छन् ।

११ महिना अगाडि


पोखरा — पोखराको बेगनास तालमा शनिबार दिउँसो डुंगा पल्टिँदा पाँच जना बेपत्ता भएका छन् । नौ जना सवार डुंगामा दुई महिला र तीन बालबालिका बेपत्ता भएका हुन् ।
दुई महिला र दुई पुरुषको उद्धार गरिएको कास्कीका प्रहरी नायब उपरीक्षक रवीन्द्र गुरुङले जानकारी दिएका छन्।
उनीहरुलाई उपचारका लागि शिशुवाको लेखनाथ लायन्स सामुदायिक अस्पतालमा लगिएको छ। उनीहरु मध्ये दुई जनाको अवस्था गम्भीर छ ।

तीजको दर खाने कार्यक्रममा सहभागी हुन जाँदै गरेका चेलिबेटी बोकेको डुंगा दुर्घटना भएको हो।पोखरा–३० बेगनासका कमलराज कँडेलले शनिबार आफ्नो घरमा चेलिबेटीलाई दर खुवाउने कार्यक्रम राखेका थिए। उनी चेलिबेटीलाई लिन आफ्नै डुंगामा ताल वारि आएका थिए। कँडेल उपचाररार्थ अस्पतालमा छन्। चेलिबेटी, भाञ्जाभाञ्जी बोकेर पारि फर्किदैँ गर्दा तालको मध्य भागमा डुंगा पल्टिएको थियो।डुंगा दुर्घटनाको कारण खुलिनसकेको प्रहरीले जनाएको छ।
गैंडाकोटबाट आएका एकै परिवारका श्रीमान्, श्रीमती र दुई छोराछोरी दुर्घटनामा परेका छन्। श्रीमतीले पौडिएर ज्यान जोगाएपछि बाँकी तीनजना बेपत्ता भएको कँडेलकी आफन्त सविता तिवारीले बताइन्। ‘सानोबुबा सधैं वारपार गर्नुहुन्थ्यों,’ उनले भनिन्, ‘मलाई पनि बोलाउनुभएको थियो आज। कार्यालयमा बिदा नमिलेर जान पाइँन। आजै यस्तो भयो।’बाँकी बेपत्ताको खोजी कार्य जारी रहेको डाँडाको नाक प्रहरी चौकीका प्रहरी निरीक्षक किरण राउतले जनाए ।