नेपालको गलत नक्सा प्रकाशन गर्नेलाई २० हजार जरिवाना

७ महिना अगाडि ७६१ खबर

काठमाडौं– नापी विभागले विभिन्न सञ्चार माध्यमहरुमा नेपालको गलत नक्सा प्रकाशन तथा प्रशारण हुने क्रम नरोकिएको भन्दै सरोकारवालाहरुको ध्यानाकर्षण गराएको छ ।

विभागले आइतबार पत्रकार सम्मेलन गरी कुनैपनि सञ्चारमाध्यमले नेपालको नक्सा प्रकाशन तथा प्रशारण गर्नुअघि आधिकारिक हो होइन भनेर जाँचेरमात्रै प्रकाशन गर्न आग्रह गरेको छ ।

‘अधिकांश मिडिया, विज्ञापन कम्पनी, बैंक तथा वित्तीय संस्थाहरुले समेत गलत नक्सा प्रयोग गर्ने क्रम रोकिएको छैन । राष्ट्रियताजस्तो विषयमा सबैले अलिकति ध्यान दिनुपर्ने हो । ध्यान नदिँदा गलत सन्देश प्रवाह हुन्छ । त्यसैले हामीले बारम्बार भन्दै आएका छौँ । यदि कसैले नेपालको नक्सा प्रयोग गर्नुपर्यो भने विभागको वेवसाइटबाट निःशुल्क डाउनलोड गरेर प्रयोग गर्न आग्रह गर्दछौँ’ पत्रकार सम्मेलनमा विभागका महानिर्देशक गणेश भट्टले भने ।

विभागले २०७४ साल असोज २ बाट नयाँ नक्सा प्रयोगमा ल्याएको हो ।

‘त्यसबीचमा विभागले आजसहित चार पटक पत्रकार सम्मेलन गरेर आधिकारीक नक्सा प्रयोग गर्न आग्रह गरिसकेको छ । सवै सरकारकारी कार्यालयमा पत्र समेत पठाइएको छ । अब पनि यो क्रम नरोकिए हामी कानुनी कारवाहीको प्रक्रियामा जान बाध्य हुनेछौं । त्यसअघि हामी अनुगमन पनि गर्छौ’ महानिर्देशक भट्टले जानकारी दिए ।

जग्गा नापजाँच ऐन, २०१९ को दफा १२ ९५० बमोजिम गलत नक्शा प्रकाशन गरेमा रु २० हजार जरिवाना हुनुका साथै सम्पूर्ण प्रकाशन सामाग्रीहरु जफत गरिने व्यवस्था छ ।

विभागले डिजिटल रुपमा नेपालको नयाँ नक्सा वेवसाइटमा राखेपनि अबको केही दिनमा छापेर प्रचारप्रसार गर्ने पनि जनाएको छ ।

विभागले सर्वसाधारणलाई सजिलै बुझ्न आधिकारिक नक्शा हेर्दा सुदूरपश्चिमको दार्चुला जिल्लाको टुप्पोमा चुच्चो भएको हेर्न भनेको छ । ‘दार्चुला जिल्लाको माथिल्लो भाग डाडुजस्तो भएको नक्सा गलत हो चुच्चो भएको नक्सा सहि हो । प्रयोग गर्दा चुच्चो भएको नक्सा प्रयोग गर्नुहोला’ महानिर्देशक भट्टले भने ।