बिष्णुपुर गाउँपालिका : शिक्षा र स्वास्थ्य विकासको प्राथमिकता

६ महिना अगाडि ७६१ खबर डटकम

सिराहा – सिराहाको बिष्णुपुर गाउँपालिकाले शिक्षा र स्वास्थ्य क्षेत्रको बिकासका लागि करोडौ रुपैयाँ लगानी गरेको छ । गाउँपालिकाका सबै वडामा सर्वसुलभ रुपमा शिक्षा र स्वास्थ्यको पहुँच विस्तार गर्ने अभियान अनुसार लगानी भइरहेको गाउँपालिकाले जनाएको छ ।
गाउँपालिकाका अध्यक्ष जागेश्वर यादवले आफु निर्वाचित भएदेखिनै सिंगो गाउँपालिकामा शिक्षा, स्वास्थ्य र भौतिक पूर्वाधारको विकासमा लागि परेको बताउँनुभएको छ । उहाँका अनुसार गाउँपालिकाको १४ वटा बिद्यालयमा एक कक्षादेखि नै अनिवार्य अंग्रेजी भाषाको पढाईको विकास गर्दै विद्यालयका भवन निमार्ण, एससीडी प्रोजेक्टर वितरण लगायतका काम भएको छ ।




गाउँपालिकाका ५ वटै वडामा रहेका १४ वटा विद्यालयमा यी कामका लागि २ करोड रुपैयाँ गाउँपालिकाले लगानी गरेको छ । यस्तै, स्वास्थ्य क्षेत्रको बिकासका लागि ३ वटा स्वास्थ्य चौकी भवन निमार्ण पनि भइसकेको जनाइएको छ । भवन निमार्णमा मात्र ३ करोड रुपैयाँ गाउँपालिकाले खर्च गरेको छ । यस्तै, गाउँपालिकाले रामजानकी कुटीमा डेढ विगाहा क्षेत्रमा अस्पताल समेत निमार्ण गर्दै रहेको जनाएको छ ।

के के काम भयो गाउँपालिकामा ?

गाउँपालिकामा जननिर्वाचित प्रतिनिधि आएसँगै समग्र गाउँपालिकाको विकासमा जोड दिएको छ । गाउँपालिकाले अहिलेसम्म भौतिक पूर्वाधाका क्षेत्रमा २ किमी सडक कालोपत्रे, ८ सय मिटर नाला निमार्णको काम गरेको छ । अध्यक्ष यादवका अनुसार कालोपत्रे गर्न मात्र ३ करोड रुपैयाँ खर्च भएको थियो । यस्तै, खानेपानीको पाइप वितरण, सरसफाई, पोखरीको जिर्णोद्वारा गर्ने जस्ता काम पनि गाउँपालिकाले गरेको छ ।



गाउँपालिकाको वडा नम्वर १ स्थित खोरिया टोलमा ११ कठ्ठा जग्गामा वृद्धाश्रम निमार्ण गर्ने, ७ विगाहामा पोखरी जिर्णोद्वारा गर्ने, ५३७ विगाहा सार्वजनिक जग्गा संरक्षण, वृद्ध रोपण, तारवार लगाउने काम गाउँपालिकाले प्राथमिकताका साथ गरिहरेको छ । यस्तै, गाउँपालिकाले विपन्नका लागि न्यानो कपडा वितरण गर्ने, गाउँपालिकाका विद्यालय उमेर समूहका सवै वालवालिका विद्यालय भर्ना गर्नै लगायतका काम पनि गरेको छ ।

पोखरी जिर्णोद्वारामा मात्र १० लाख खर्च हुने, पोखरी, जंगल लगायतको संरक्षणवाट वार्षिक ३ करोड आम्दानी हुने पनि जनाइएको छ । यस्तै, गाउँपालिकाले ९७ विगाहामा धानवाली लगाएको छ । जसवाट वार्षिक १६ लाख आम्दानी गर्दैछ ।

यी हुन समस्या



गाउँपालिकामा थुप्रै काम गर्ने योजना भएपनि कानुनी समस्याका कारण काम हुन नसकेको अध्यक्ष यादव बताउँनुहुन्छ । रकमको अभाव, कानुनी अड्चन, कर्मचारी समस्याले पनि काममा वाधा पुगेको उहाँको भनाइ छ । शिक्षा, स्वास्थ्य र भौतिक पूर्वाधारलाई गाउँपालिकाले विकासको प्राथमिकतामा राखेको भएपनि कानुनी समस्याले गर्दा सोचेजती काम गर्न नसकेको उहाँको तर्क छ । यद्यपी, अहिले भइरहेका काममा जनप्रतिनिधि र कर्मचारीको साथ भने पाइरहेको उहाँले बताउँनुभयो ।

संविधानले नै स्थानीय तहमा थुप्रै अधिकार प्रत्यायोजन गरेको भएपनि व्यवहारिक रुपमा त्यो स्थानीय तहका जनप्रतिनिधिमा नपुगेको र जिम्मेवारी अनुसार काम गर्न नसकिएको उहाँको भनाइ छ । गाउँपालिकाको ५ वटै वडामा समानुपातिक रुपमा विकास योजना वनाइएको भएपनि कानुनका कारण समस्या झेल्नु परेको यादव बताउँनुहुन्छ ।