भक्तपुर, २२ फागुन -प्रधानमन्त्री केपी शर्मा ओलीको सफल मिर्गौला प्रत्यारोपण भएपछिको स्वास्थ्य अवस्था सामान्य रहेको चिकित्सकले जनाएका छन् । बुधबार मिर्गौला प्रत्यारोपणपछि आईसीयूमा सारिएका प्रधानमन्त्री ओलीको स्वास्थ्य सूचक राम्रो रहेको हो । उपचारमा संलग्न चिकित्सक डा. प्रेम ज्ञवालीका अनुसार प्रधानमन्त्रीको शरिरमा दोश्रो पटक प्रत्यारोपण गरिएको मिर्गौलाले राम्रोसँग काम गरिरहेको छ । प्रधानमन्त्री र उनकी भान्जी समीक्षाको स्वास्थ्य सामान्य रहेकाले उनीहरुलाई आजबाट तरल खानेकुरा खुवाइने छ । ’उहाँहरुको अवस्था जटिल छैन, सामान्य नै छ,’ उनले भने, ’अहिले कालो चियाबाट तरल खानेकुरा खुवाउन सुरु गर्ने तयारी भएको छ ।’ उनका अनुसार प्रधानमन्त्री ओली बोल्न सक्ने अवस्थामा छन् । तर दुखाई कम गर्ने औषधि चलाइएका कारण चिकित्सकहरुले नै बोल्न दिएका छैनन् । प्रधानमन्त्रीलाई डिस्चार्ज हुन कम्तीमा एक साता लाग्ने भएको छ । त्रिवि शिक्षण अस्पताल स्रोतले प्रधानमन्त्रीको स्वास्थ्यमा जटिलता नआए अब एक साताभित्र डिस्चार्ज गरी घर पठाउन सकिने बतायो । त्रिवि शिक्षण अस्पतालका प्रा.डा. प्रेमराज ज्ञवालीसहितको टोलीले बुधबार प्रधानमन्त्रीको दोस्रोपटक सफल मिर्गौला प्रत्यारोपण गरेको थियो । चिकित्सकका अनुसार बुधबार बिहान साढे १० बजे सुरु गरिएको प्रत्यारोपण सम्पन्न हुन करिब साढे चार घन्टा लागेको थियो ।