फाल्गुण २१,त्रिपुरासुन्दरी नगरपालिका (डोल्पा) डोल्पाको त्रिपुरासुन्दरी नगरपालिका–१ मा फैलिएको अज्ञात रोगको नमूना परीक्षाणका लागि चिकित्सकसहितको टोली हेलिकोप्टरबाट करेलीकाँडा पुगेको छ । रोग प्रभावित क्षेत्रका सबैको नमूना परीक्षाणका लागि रगत, र्याल, खकार, दिसा, पिसाबलगायतका स्याम्पल संकलनका लागि प्रदेश अस्पतालका डाक्टर इन्द्रबहादुर थापा र ल्याब टेक्निसीयन कमलकुमार थापा सेनाको हेलिकप्टरमा भर्खरै प्रकोप क्षेत्रमा पुगेका छन् । स्याम्पल संकलन गरेर परीक्षणका लागि काठमाडौंस्थित टेकु अस्पतालमा लैजाने बताइएको छ । त्यस्तै प्रकोप क्षेत्रमै बसेर उपचार गर्न जिल्ला अस्पताल डोल्पाबाट डाक्टर मेलिना हमाल र एच।ए सारङ्गा रोकाय पनि हेलिकप्टरमा गएको जिल्ला अस्पताल डोल्पाका प्रमुख डा. सिजन रावलले जानकारी दिए । चिकित्सकसहित माक्स,पन्जा,एन्टी भाइरल लगायतका आवाश्यक औषधिसमेत सँगै ल्याएको डा। रावलले बताए । प्रकोप क्षेत्रमा तीन दिनदेखि स्वास्थ चौकी त्रिपुराकोटमा कार्यरत सिनियर अहेव शेरबहादुर कठायत र अनमि लक्ष्मी न्यौपानेले बिरामीको उपचार गरिरहेका छन् । ४५ घरधुरी भएको करेलीकाँडामा रोगका कारण घरैपिच्छे बिरामी भएको र अहिलेसम्म ५० भन्दा धेरै बिरामीलाई पुर्जा काटेरै उपचार गरिएको स्वास्थकर्मीको टोलीले जानकारी दियो ।प्रभावित क्षेत्रका बिरामीमा रुघाखोकी, ज्वरो, झाडापखाला, बान्ता गर्ने, रिंगटा लाग्ने, शरीर दुख्नेजस्ता लक्षण देखिएको समेत स्वास्थकर्मीले बताए । नयाँपत्रिकाका अनुसार,डोल्पा क्षेत्र नं २ बाट निर्वाचित सांसद बिरबहादुर शाही र बद्मीकुमारी बोहोराले रोगका बिषयमा कर्णाली प्रदेश सभामा सरकारको ध्यानकर्षण गराएपछि प्रदेश सरकारले उपचारको व्यवस्था मिलाएको हो ।
