भदौ ३, जिल्ला संस्करण (दाङ) - दाङको तुलसीपुर उपमहानगरपालिकाले समयमै विकास निर्माणको काम पूरा गर्न योजना क्यालेन्डर निर्माण गर्ने भएको छ । चालू आर्थिक वर्षभित्र सञ्चालन हुने योजनालाई समेटेर क्यालेन्डर निर्माण गर्ने भएको हो । समयमै योजनाको डिपिआर र लगत स्टिमेट नबनेका कारण वर्षको अन्त्यमा मात्रै योजना सम्पन्नको चटारो हुने भएको भन्दै उपमहानगरपालिकाले यस्तो योजना अगाडि बढाएको उपमहानगरपालिकाका प्रमुख घनश्याम पाण्डेले बताउनुभयो ।उहाँले जनशक्ति भए पनि काममा प्रतिफल आउन सकेको अवस्था नभएको भन्दै अहिले उपमहानगरपालिकामा पर्याप्त जनशक्ति भएकाले सोहीअनुसार प्रतिफल देखाउन अनुरोध गर्नुभयो । उहाँका अनुसार अहिले उपमहानगरपालिकामा १६ सिभिल इञ्जीनियर, १२ सवइञ्जीनियर, १६ असिस्टेन्ट सवइञ्जीनियर र १२ जना अमिन रहेका छन् । अहिले हरेक वडावडामा प्राविधिक जनशक्ति पठाएर उपमहानगरपालिकाले वडाबाटै प्राविधिक काम अगाडि वढाइरहेको छ ।प्रमखु पाण्डेले ठूला योजनाका लागि विस्तृत परियोजना निर्माण एकाइ गठन गरेर काम गर्ने पनि बताउनुभयो । राससका अनुसार,समयमै योजनाको डिपिआर र प्राविधिक स्टिमेट नहुँदा जनताले दःुख पाइरहेको भन्दै यस्तो हुन नहुने उहाँको भनाइ छ ।