भक्तपुर, २८ साउन – प्रदेश १ को धनकुटास्थित पाख्रीबास नगरपालिकाले चालु आर्थिक बर्षका लागि ३८ करोड ९१ लाख ९८ हजार रुपैयाँको बजेट पारित गरेको छ । नगरपालिकाले चालु आवका लागि संघीय र प्रदेश सरकारवाट प्राप्त हुने समानीकरण, वित्तीय अनुदान तथा राजश्व बाँडफाँडवापतको बजेटलाई आधार मानेर यो बजेट निमार्ण गरेको हो ।
नगरपालिकाले चालु आवको आय तर्फ संघीय सरकारवाट वित्तीय समानीकरण अन्तर्गत ९ करोड ५० लाख तथा सशर्त अनुदान १४ करोड ४१ लाख प्राप्त गरेको छ ।

सशर्त अनुदान स्वरुप प्राप्त १४ करोड ४१ लाख र प्रदेश सरकारबाट प्राप्त हुने अनुमानित सशर्त अनुदान १ करोडबाट सञ्चालन गरिने कार्यक्रमहरू तथा त्यसको लागि लाग्ने लागत समेत एकिन गरी विविध कार्यक्रम तयार गरेको नगरपालिकाका मेयर बृषवहादुर राइले जानकारी दिनुभयो ।
आन्तरिक श्रोत तर्फ ८० लाख आम्दानी हुने अनुमान गरिएको नगरमा प्रदेश सरकारबाट वित्तीय समानीकरण तर्फ ६९ लाख ७४ हजार प्राप्त हुने अनुमान रहेको उहाँको भनाई छ ।
संघीय राजश्व बाँडफाँडबाट ७ करोड १८ लाख प्राप्त हुने अनुमान रहेको छ भने प्रदेश राजश्व बाँडफाँड अनुदान मार्फत ४३ लाख २४ हजार प्राप्त हुने अनुमान रहेको राइले जानकारी दिनुभयो ।
यस्तै, नगरले व्यय तर्फ ३८ करोड ९१ लाख ९८ हजार मध्ये चालु खर्च तर्फ ५ करोड, सङ्घीय सशर्त अनुदान खर्च तर्फ १४ करोड ४१ लाख, विषयगत कार्यक्रम तर्फ ८० लाख र प्रत्येक वडालाई ३० लाखमा नघट्ने गरी पुँजीगत तर्फको बजेट विनियोजन गरेको मेयर राइले बताउँनुभयो । यस्तै, सामाजिक सुरक्षा तर्फ ४ करोड ५० लाख विनियोजन गरिएको छ ।
नगरपालिकाका दुई प्रमुख गौरवका क्रमागत योजनाहरु भ्यू टावर र नगरपालिका भवन निर्माणका लागि ३ करोड ३० लाख बिनियोजन गरिएको छ । नगरस्तरीय योजना संचालन गर्न १ करोड ६५ लाख बिनियोजन गरिएको छ भने नगरको एकीकृत नगर विकास गुरुयोजना तथा विस्तृत परियोजना प्रतिवेदन तयार गर्न १ करोड विनियोजन गरिएको छ ।