मालिका गाउँपालिका : पर्यटन विकासको गुरुयोजना तयार

१२ महिना अगाडि रासस

म्याग्दी, ८ भदौ । मालिका गाउँपालिकाले पर्यटन विकासका लागि पाँच बर्षे गुरुयोजना तयार पारेको छ । उक्त गुरुयोजनामा मालिकाका पर्यटकीयस्थलमा आधारभूत पूर्वाधार निर्माणका लागि सात करोड पचास लाख लगानीको प्रस्ताव गरिएको छ ।
पर्यटकीयस्थलको अवस्था, सम्भावना, समस्या र आवश्यकता पहिचान गरी पूर्वाधार निर्माणका लागि सो गुरुयोजना निर्माण गरिएको हो । मालिकाको पर्यटक विकासका लागि पदमार्ग, होमस्टे र पर्यटक विश्रामस्थल र आवासस्थल लगायतका पूर्वाधार निर्माणमा प्राथमिकता दिनुपर्ने गुरुयोजनामा उल्लेख छ ।

मालिका धुरी, भालेबास्ने ताल, बराह ताल, सोले डाडाँ, दुरु लेक, गाईखर्क ताल र देवताभीर, गुफा जस्ता पर्यटकीयस्थलको पूर्वाधार विकास, प्रचार प्रसार र योजनाको अभावमा ओझेलमा पर्दै आएका थिए ।
गुरुयोजनामा बेनी नगरपालिकाको पछैदेखि मङ्गला र रघुगङ्गाको सीमाक्षेत्रमा अवस्थित टोड्के हुँदै भालबास्ने ताल, बिम बराह, दरवाङ, निस्कोट बराह, दुरुलेक, सोलेडाडाँ, गाईखर्क ताल र देवताभिरलाई जोड्ने पदमार्गको नक्साङ्कन गरिएको छ । रुम, विम, देवीस्थान र निस्कोटलाई होमस्टे गाउँका रूपमा विकास गर्ने लक्ष्य राखिएको छ ।

पर्यटनविज्ञसहितको टोलीले स्थलगत अध्ययन र सरोकारवालासँग छलफल गरेर गुरुयोजना तयार पारेको परामर्शदाता कम्पनी शुभारम्भ उद्यमशील प्रालिका कुलचन्द्र रेग्मीले बताए ।
गुरुयोजनाअनुसार पर्यटकीयस्थलमा पूर्वाधार निर्माण, प्रचार प्रसार र प्रवर्द्धनात्मक कार्यक्रम गरिने उपाध्यक्ष खरमाया बिटालुले बताइन् । पर्यटन विकासका लागि गुरुयोजनालाई मागदर्शनका रूपमा लिएर गाउँपालिकाले पर्यटन विकासका योजना तय गर्ने अधिकृत सुवेदीले बताए ।